मित्रांनो, जेव्हा आपण चोरांच्या किंवा दरोडेखोरांच्या टोळीबद्दल ऐकतो, तेव्हा आपल्या डोळ्यांसमोर पुरुषांचे चेहरे येतात. पण जर मी तुम्हाला सांगितले की, चार वयस्कर महिला एकत्र येतात, एका जिल्ह्यातून दुसऱ्या जिल्ह्यात फक्त आणि फक्त चोरीच्या उद्देशानं प्रवास करतात, आणि काही मिनिटांत लाखो रुपयांचे दागिने गायब करतात, तर ते तुम्हाला खरं वाटेल का..? नाही ना… पण हे घडलंय. एक खळबळजनक आणि चक्रावून टाकणारी घटना घडलीय, अहिल्यानगर जिल्ह्यातील कर्जत शहरात.
येथील सुरेश काका सराफ अँड सन्स या दुकानात चार महिलांच्या टोळीने भरदिवसा १ लाख ६९ हजार रुपयांपेक्षा जास्त किंमतीचे दागिने लंपास केले. पण म्हणतात ना, चोराने कितीही हुशारी दाखवली तरी कायद्याचे हात त्याच्यापर्यंत पोहोचतातच. कर्जत पोलिसांनी अत्यंत कौशल्याने या बीडच्या ‘महिला गँग’च्या मुसक्या आवळल्या आहेत. या महिला नेमक्या कोण आहेत? आणि त्या केवळ चोरीसाठीच नगर जिल्ह्यात का आल्या होत्या? या सर्व प्रश्नांची उत्तरे आज आपण या व्हिडिओत सविस्तर पाहणार आहोत.
ही घटना घडली कर्जत येथील बाजारतळ परिसरातील सुरेश काका सराफ अँड सन्स’ या दुकानात. दुकानात नेहमीप्रमाणे ग्राहकांची लगबग सुरू होती. दुकानाचे संचालक ओम कुलथे ग्राहकांना सांभाळत होते. दुपारी सव्वा एक वाजण्याच्या सुमारास चार महिला ग्राहक बनून दुकानात आल्या. त्यांच्यासोबत एक लहान मूलही होतं. त्यांचा पेहराव इतका सामान्य होता की कोणालाही त्यांच्या हेतूवर संशय आला नाही. या महिलांनी काउंटरवरील कर्मचाऱ्यांना चांदीचे पैंजण आणि वाळे दाखवण्याची गळ घातली.
कर्मचारी अजीज झारेकरी यांनी एकापाठोपाठ एक डिझाईन्स दाखवल्या. पण या महिलांचा हेतू खरेदी करण्याचा नव्हताच. या महिला टोळीने अतिशय नियोजनबद्ध पद्धतीने काम सुरू केले. दोन महिलांनी दुकानाच्या कर्मचाऱ्यांना वेगवेगळ्या डिझाईन्स दाखवण्यास सांगून, बोलण्यात पूर्णपणे गुंतवून ठेवले. आणि याच गोंधळाचा फायदा घेत, इतर महिलांनी काउंटरवर ठेवलेले चांदीचे पैंजण अत्यंत हुशारीने साडीच्या आड गायब केले. एकूण १२ जोड चांदीचे पैंजण, ज्यांची किंमत सुमारे १ लाख ६९ हजार ६७१ रुपये होती, ते या महिलांनी लंपास केले आणि काहीही न खरेदी करता त्या दुकानातून अत्यंत शांतपणे निघून गेल्या.
या महिला दुकानातून गेल्यानंतर जेव्हा काही वेळाने काउंटरवरील दागिन्यांची मोजदाद करण्यात आली, तेव्हा पैंजणांचे बॉक्स गायब असल्याचे लक्षात आले. ओम सचिन कुलथे यांनी तातडीने दुकानात बसवलेले सीसीटीव्ही कॅमेरे तपासले आणि या महिलांची संपूर्ण हातचलाखी कॅमेऱ्यात स्पष्टपणे कैद झाल्याचे समोर आले. त्यांनी तात्काळ कर्जत पोलीस ठाण्यात धाव घेऊन गुन्हा दाखल केला. पोलीस निरीक्षक हनुमान गायकवाड यांच्या मार्गदर्शनाखाली कर्जत पोलिसांच्या गुन्हे शोध पथकाने सीसीटीव्ही आणि तांत्रिक विश्लेषणाच्या आधारे तपास सुरू केला. आणि अवघ्या काही दिवसांत पोलिसांनी बीड जिल्ह्यातून ज्या चार महिलांना अटक केली, त्यांची नावे आणि वय ऐकून तुम्हीही थक्क व्हाल…
द्वारका मच्छिंद्र केंगार – वय ५२ वर्षे
शिलाबाई लक्ष्मण केंगार – वय ४८ वर्षे
लीलावती लक्ष्मण केंगार – वय ५० वर्षे
कलावती मोतीराम केंगार – वय ५८ वर्षे
यांना पोलिसांनी ताब्यात घेतलं. या चारही महिला मुर्शिदपूर, जिल्हा बीड येथील रहिवासी आहेत. विशेष म्हणजे, या सर्व महिला मध्यमवयीन आणि ज्येष्ठ नागरिक या गटातील आहेत, ज्यांच्यावर सहसा कोणी संशय घेत नाही. याच गोष्टीचा त्यांनी फायदा घेतला.
आता येथे सर्वात मोठा प्रश्न उपस्थित होतो, जो पोलिसांनाही पडला होता… या महिला बीड जिल्ह्यातून तब्बल १५० ते २०० किलोमीटरचा प्रवास करून अहिल्यानगर जिल्ह्यात का आल्या होत्या? त्यांचे येथे कोणी नातेवाईक होते का? की त्या कोणत्या कामासाठी आल्या होत्या? पोलीस तपासात आणि त्यांच्याकडून झालेल्या कसून चौकशीत एक धक्कादायक बाब समोर आली. या महिला बीड जिल्ह्यातून कोणत्याही नातेवाईकाला भेटायला किंवा इतर कामासाठी आल्या नव्हत्या; तर त्यांचा मुख्य आणि एकमेव उद्देश केवळ आणि केवळ ‘चोरी करणे’ हाच होता! या महिलांची ही एक संघटित टोळी आहे. त्या बीडवरून एसटी बस किंवा ट्रॅव्हल्सने निघतात.
वाटेत लागणाऱ्या वेगवेगळ्या मोठ्या शहरांमधील बाजारपेठा त्या टार्गेट करतात. विशेषतः ज्या दुकानांमध्ये गर्दी जास्त असते आणि जिथे महिला ग्राहकांचा वावर सहज मानला जातो, अशा सराफा दुकानांची त्या आधी ‘रेकी’ करतात. एकाच वस्तीतील आणि एकाच कुटुंबाशी संबंधित असलेल्या या महिला कोणत्याही पुरुषाचा आधार न घेता, स्वतःच नियोजन करतात आणि चोरी करून लगेचच आपला जिल्हा गाठतात. जेणेकरून स्थानिक पोलिसांना त्यांचा माग काढणे कठीण जावे. पण कर्जत पोलिसांच्या चोख नियोजनापुढे त्यांची ही युक्ती अपयशी ठरली.
या बीडच्या महिला गँगच्या ‘मोडस ऑपेरांडी’वरून सर्व सराफा व्यावसायिकांनी काही अत्यंत महत्त्वाचे धडे घेण्याची गरज आहे. वय किंवा पेहरावावर जाऊ नका. गुन्हेगाराला कोणताही चेहरा किंवा वय नसते. वयस्कर महिला किंवा लहान मूल सोबत आहे म्हणून सतर्कता कमी करू नका. ग्राहकांसमोर एकाच वेळी अनेक बॉक्स किंवा ट्रे ठेवू नका. एक जिन्नस दाखवून तो सुरक्षित ठेवल्यावरच दुसरा बाहेर काढा.
दुकानात एकापेक्षा जास्त ग्राहक आल्यास, प्रत्येक ग्रुपवर लक्ष ठेवण्यासाठी स्वतंत्र कर्मचारी नियुक्त करा, जेणेकरून कोणाचेही लक्ष विचलित होणार नाही. दुकानातील कॅमेरे नेहमी सुस्थितीत आणि हाय-रिझोल्यूशनचे ठेवा. जेणेकरुन कोणतीही घटना घडली, तर पोलिसांना तपास सोपा जाईल…कर्जत पोलिसांची ही कामगिरी खरोखरच कौतुकास्पद आहे.
