माणसाचं आयुष्य किती अनिश्चित असतं, याची जाणीव करून देणारी घटना अहिल्यानगर जिल्ह्यातील वांबोरी परिसरात घडली आहे. वांबोरी-खडांबे रस्त्यावर झालेल्या भीषण अपघातात एका तरुणाला आपला जीव गमवावा लागला. या घटनेमुळे संपूर्ण परिसरात हळहळ व्यक्त होत आहे.
मृत तरुणाचं नाव महेश भाऊराव तोगे. वय अवघं २८ वर्षे! मंगळवारी, ६ ऑक्टोबर रोजी सायंकाळी साडेसहा वाजण्याच्या सुमारास मुनोत पेट्रोल पंपापासून अवघ्या २०० फुटांवर तवेरा आणि दुचाकी यांच्यात भीषण अपघात झाला. या धडकेत महेश यांचा दुर्दैवी मृत्यू झाला.
महेश यांच्या अकाली निधनाची बातमी समजताच कुटुंबीय, नातेवाईक आणि मित्रपरिवारावर दुःखाचा डोंगर कोसळला. ज्या वयात आयुष्याची स्वप्नं पूर्ण करण्याची धडपड सुरू असते, त्याच वयात महेश यांचा प्रवास संपला.
या घटनेने वांबोरी परिसरात शोककळा पसरली आहे. एका अपघाताने कुटुंबाचा आधार हिरावला आणि अनेकांच्या मनात दुःखाची कायमची जखम सोडली. क्षणभराचा निष्काळजीपणा आयुष्यभराचं दुःख देऊ शकतो. त्यामुळे वाहन चालवताना काळजी घ्या आणि वाहतुकीचे नियम पाळा.
