सणासुदीच्या काळात वाढणाऱ्या घरखर्चात आता काहीसा दिलासा मिळण्याची शक्यता आहे. केंद्र सरकारने खाद्यतेलाच्या आयात शुल्कात कपात केल्यामुळे सोयाबीन, सूर्यफूल आणि पाम तेलाच्या किरकोळ दरात घट होण्याची शक्यता निर्माण झाली आहे.
सध्या शेंगदाणा तेल सुमारे २४० रुपये, सूर्यफूल तेल १८५ रुपये, तर सोयाबीन तेल १६० रुपये किलो दराने विकले जात आहे. भारत आपल्या गरजेपैकी तब्बल ५० ते ६० टक्के खाद्यतेल आयात करतो. त्यामुळे आंतरराष्ट्रीय बाजारातील बदलांचा थेट परिणाम देशातील दरांवर होतो.
आयात शुल्क कपातीचा फायदा ग्राहकांपर्यंत पोहोचण्यासाठी व्यापाऱ्यांनी जुना साठा लवकर संपवून नव्या दराने विक्री करणे अपेक्षित आहे.
मात्र, प्रत्यक्ष दर किती कमी होतील, हे बाजारातील परिस्थितीवर अवलंबून असेल. दर कमी झाल्यास नवरात्र, दसरा आणि दिवाळीत गृहिणींच्या बजेटला निश्चितच मोठा दिलासा मिळू शकतो.
