५० ते ८० लाख रुपये घेऊन माणसाच्या शरीरातून किडनी गायब करणारी एक आंतरराष्ट्रीय टोळी.. भारतापासून कंबोडियापर्यंत पसरलेलं असं भयंकर रॅकेट… आणि एका चिनी डॉक्टरचा, भारताला आतून पोखरणारा प्लॅन… मग येतो, एक डॅशिंग एसपीएस ऑफीसर… आणि या सगळ्या रॅकेटचा तो ‘चून चून के’ पर्दाफाश करतो…
तुम्हाला वाटेल, ही एखाद्या साऊथ चित्रपटाची किंवा वेब सीरिजची स्टोरी असेल… तर थांबा… हा कोणताही सिनेमा नाही, तर आपल्या महाराष्ट्रात घडलेलं अत्यंत क्रूर आणि भयानक सत्य आहे! कंबोडिया आणि चीनच्या आंतरराष्ट्रीय गुन्हेगारांनी भारतातल्या ५० पेक्षा जास्त लोकांच्या किडन्या काढल्या! पण… या आंतरराष्ट्रीय माफियांचा गेम ओव्हर केला, आपल्या अहिल्यानगरच्या एका सुपुत्राने! होय, ३१ ऑक्टोबर २०२६ रोजी चंद्रपूरचे अप्पर पोलीस अधीक्षक ईश्वर कातकडे यांना देशाचा सर्वोच्च तपास बहुमान— ‘केंद्रीय गृहमंत्री दक्षता पदक’ जाहीर झालं. आजच्या व्हिडिओमध्ये आपण पाहणार आहोत, नगरच्या या वाघाने दिल्लीचे बडे डॉक्टर आणि चीनचे तस्कर कसे वठणीवर आणले.
आजच्या थरारक व्हिडीओचे हिरो आहेत आयपीएस ऑफिसर ईश्वर कातकडे. ते कुठल्या मोठ्या शहरातून किंवा आंतरराष्ट्रीय विद्यापीठातून आलेले नाहीत. त्यांची नाळ जोडलेली आहे अहिल्यानगर जिल्ह्यातील शेवगाव तालुक्यातल्या ‘ठाकूर निमगाव’ या छोट्याशा गावाशी! परिस्थिती इतकी गरिबीची की रोज शेतात घाम गाळावा लागायचा. रेग्युलर कॉलेजला जायला पैसे नव्हते. पण जिद्द बघा… त्यांनी मुक्त विद्यापीठातून घरची शेती सांभाळत पदवी पूर्ण केली. ज्या मुक्त विद्यापीठाला लोक कमी लेखतात, तिथे शिकून या तरुणाने २०१०-११ च्या MPSC परीक्षेत अख्ख्या महाराष्ट्रात पहिला येण्याचा रेकॉर्ड केला! एका जिल्हा परिषदेच्या शाळेतून सुरू झालेला हा प्रवास आज आयपीएस दर्जापर्यंत पोहोचला. आणि याच जिद्दी अधिकाऱ्यासमोर २०२५-२६ मध्ये एक असं आव्हान आलं, ज्याने आंतरराष्ट्रीय यंत्रणा हादरली!
गोष्ट सुरू होते, चंद्रपूरच्या मिंथुर गावातून. रोशन कुडे नावाचा एक गरीब शेतकरी. त्याने अवघं १ लाख रुपये कर्ज घेतलं होतं. पण सावकारांनी व्याजाचा असा काही राक्षस बनवला की १ लाखाचे थेट ७४ लाख रुपये केले! सावकार दररोज घरी येऊन रोशनला मरणाच्या धमक्या देऊ लागले. वैतागलेल्या रोशनने सोशल मीडियावर एक व्हिडिओ टाकून स्वतःची व्यथा मांडली. हा व्हिडिओ जेव्हा अप्पर पोलीस अधीक्षक ईश्वर कातकडे यांच्या समोर आला, तेव्हा त्यांनी तातडीने सूत्रं फिरवून ६ सावकारांना बेड्या ठोकल्या.
सामान्य पोलीस तपास इथेच संपला असता. पण कातकडे हे सामान्य अधिकारी नव्हते. रोशनच्या डोळ्यात त्यांना एक भयंकर रहस्य दिसत होतं. त्यांनी रोशनला विश्वास देऊन सगळं प्रकरण जाणून घेतलं. तेव्हा रोशनने जे सांगितलं, ते ऐकून पोलिसांच्या अंगावर सरसरून काटा आला! रोशन म्हणाला, ‘सर, सावकारांपासून वाचण्यासाठी मला एका एजंटने कंबोडिया देशात नेलं… आणि तिथे माझी एक किडनी ८ लाखात विकली!’
रोशनच्या जबाबाने तपासाची दिशाच बदलली. हा साधा सावकारीचा गुन्हा नव्हता. हे होतं मानवी शरीराचा काळा बाजार करणारं आंतरराष्ट्रीय रॅकेट! कातकडे यांनी तात्काळ ९ लोकांची SIT बनवली. रोशनचा पासपोर्ट आणि मोबाईलचे सीडीआर तपासले गेले. आणि पोलिसांसमोर एक भयानक साखळी उघडी पडली. भारतातल्या गरीब आणि कर्जबाजारी तरुणांना ‘टुरिस्ट व्हिसा’वर कोलकाता विमानतळावरून कंबोडियाला पाठवलं जायचं. तिथे उतरताच एजंट त्यांचे पासपोर्ट जप्त करायचे. त्यानंतर कंबोडियाच्या एका मोठ्या मिलिट्री हॉस्पिटलमध्ये नेऊन त्यांच्यावर शस्त्रक्रिया व्हायची. आणि या संपूर्ण काळ्या धंद्याचा गॉडफादर होता— ‘डॉ. चियांग’ नावाचा एक चिनी सर्जन!
आता विचार करा, हे कंबोडियातच का व्हायचं? कारण भारतात ‘मानवी अवयव प्रत्यारोपण कायदा’ अत्यंत कडक आहे. भारतात नातेवाईकांशिवाय कुणी अवयव दान करू शकत नाही. पण कंबोडियात कायद्याच्या पळवाटा शोधून, हा चिनी डॉक्टर श्रीमंत रुग्णांना भारताच्या गरिबांच्या किडन्या विकायचा. भाषा समजत नसल्याने भारतीय तरुण तिथे पूर्णपणे असहाय्य व्हायचे.
आता ईश्वर कातकडे यांची टीम ॲक्शन मोडमध्ये आली. पोलिसांनी पहिला छापा टाकला सोलापूरमध्ये..! तिथून या रॅकेटचा मुख्य भारतीय हस्तक रामकृष्ण सांचू ऊर्फ डॉ. कृष्णा याला उचललं. धक्कादायक ट्विस्ट म्हणजे, या कृष्णाने स्वतः कधीकाळी आपली किडनी विकली होती आणि नंतर तोच एजंट बनला होता. त्यानंतर पोलिसांनी थेट पंजाबच्या मोहालीत धाड टाकून हिमांशु भारद्वाज याला बेड्या ठोकल्या, जो गरिबांना परदेशात पाठवायचा.
पण सर्वात मोठा मासा अजून बाहेरच होता. या रॅकेटचे धागेदोरे थेट दिल्ली आणि तामिळनाडूच्या त्रिची येथील व्हीआयपी हॉस्पिटल्सपर्यंत होते. दिल्लीचा एक नामांकित सर्जन— डॉ. रविंदर पाल सिंग, हा या आंतरराष्ट्रीय रॅकेटचा मुख्य सुत्रधार होता! त्याने अटक टाळण्यासाठी थेट सर्वोच्च न्यायालयापर्यंत धाव घेतली. पण ईश्वर कातकडे यांच्या टीमने न्यायालयात असे काही पुरावे ठेवले की सुप्रीम कोर्टानेही त्याचे हात झटकले! अखेर जून २०२६ मध्ये या बड्या सर्जनला पोलिसांसमोर लोटांगण घालावं लागलं.
या संपूर्ण रॅकेटने महाराष्ट्र, गुजरात आणि पंजाबमधील तब्बल ५० हून अधिक भारतीयांच्या किडन्या काढल्या होत्या! एका किडनी मागे श्रीमंतांकडून ५० ते ८० लाख वसूल करायचे आणि गरिबांच्या हातात फक्त ५ लाख टेकवायचे. या टोळीने ३० ते ४० कोटी रुपयांची अवैध उलाढाल केली होती!
पण या संपूर्ण केसमध्ये ईश्वर कातकडे यांनी जो मास्टरस्ट्रोक खेळला ना, त्याला तोड नाही! त्यांनी किडनी विकणाऱ्या गरीब शेतकऱ्यांना आरोपी बनवण्याऐवजी, या गुन्ह्यात थेट ‘प्रमुख साक्षीदार’ बनवलं! यामुळे काय झालं? आंतरराष्ट्रीय रॅकेट चालवणाऱ्या बड्या डॉक्टरांना आणि एजंट्सना सुटण्यासाठी कायद्याची एकही पळवाट उरली नाही! केस एकदम वॉटरटाईट झाली! अहिल्यानगरच्या एका छोट्याशा गावातून, मुक्त विद्यापीठात शिकून, MPSC मध्ये अव्वल आलेला एक सुपुत्र आज आंतरराष्ट्रीय तस्करांचा कर्दनकाळ ठरलाय. म्हणूनच त्यांना मिळालेलं हे ‘केंद्रीय गृहमंत्री दक्षता पदक’ संपूर्ण महाराष्ट्राचा स्वाभिमान आहे!
