एका भांड्यात वीज पडली, त्यातून मौल्यवान मूलद्रव्य तयार झालं आणि परदेशी कंपन्या हे भांडं कोट्यवधी रुपयांना विकत घेणार आहेत… या दाव्यावर विश्वास ठेवणं एका मोबाईल व्यावसायिकाला चांगलंच महागात पडलं आहे!
श्रीरामपुरातील नितीन बाळासाहेब लांडे यांना अनंत गोरीवले, गोरख जेधे, सुरज जाधव आणि राजेंद्र सोनवणे यांनी या भांड्याचं आमिष दाखवल्याचा आरोप आहे.
इस्रोतील वैज्ञानिकाशी बोलणं करून देण्याचं आणि कंपनीच्या पथकाकडून तपासणी करून भांड्याची कोट्यवधी रुपयांना विक्री होईल, असं सांगून त्यांचा विश्वास संपादन केल्याचं फिर्यादीत नमूद आहे.
जून २०२५ ते एप्रिल २०२६ या काळात लांडे यांनी ऑनलाइन २३ लाख ६० हजार, तर रोख स्वरूपात ९५ लाख रुपये दिल्याचा दावा आहे. अशा प्रकारे एकूण १ कोटी १८ लाख ६० हजार रुपयांची फसवणूक झाल्याचं फिर्यादीत म्हटलं आहे.
धक्कादायक म्हणजे, पैसे परत मागितल्यावर पिस्तूलसदृश वस्तूचा धाक दाखवल्याचाही आरोप आहे. या प्रकरणी चौघांविरुद्ध गुन्हा दाखल झाला आहे. म्हणून अशा अविश्वसनीय आमिषांना बळी पडण्याआधी सावध राहा!
