मुंगूस हा सापांचा मोठा शत्रू मानला जातो. पण हा प्राणी घरात शिरला तर अनेकजण घाबरून त्याला हाकलण्याचा किंवा मारण्याचा प्रयत्न करतात. मात्र तज्ज्ञांच्या मते हे धोकादायक ठरू शकते.
मुंगूस सामान्यतः माणसांपासून दूर राहतो. पण घराजवळ झुडपे, शेती, बाग किंवा उंदीर-साप असतील तर तो अन्नाच्या शोधात घरात शिरू शकतो. अशावेळी शांत राहणे सर्वात महत्त्वाचे आहे.
मुंगसाला पकडण्याचा किंवा मारण्याचा प्रयत्न करू नका. घाबरलेला मुंगूस आक्रमक होऊ शकतो आणि त्याच्या धारदार दातांमुळे गंभीर जखम होऊ शकते.
त्याला दूध किंवा खाणे देऊ नका. त्यामुळे तो वारंवार त्या ठिकाणी येऊ शकतो आणि लहान मुलांना किंवा पाळीव प्राण्यांना धोका निर्माण होऊ शकतो.
जर मुंगसाने चावा घेतला तर दुर्लक्ष करू नका. त्वरित डॉक्टरांकडे जाऊन उपचार आणि अँटी-रेबीज इंजेक्शन घ्या.
सर्वात सुरक्षित उपाय म्हणजे घराचे दरवाजे उघडे ठेवून त्याला स्वतः बाहेर जाण्याची संधी देणे. गरज वाटल्यास वनविभाग किंवा प्राणी बचाव पथकाची मदत घ्या.
