नेत्यांच्या वाढदिवशी लाखो रुपये फ्लेक्स, बुके आणि सत्कारावर खर्च होतात. पण मंत्री राधाकृष्ण विखे पाटील यांनी एक वेगळा आदर्श ठेवला आहे ! राज्याचे जलसंपदा मंत्री तथा अहिल्यानगर जिल्ह्याचे पालकमंत्री राधाकृष्ण विखे पाटील यांनी १५ जून २०२६ रोजी होणाऱ्या आपल्या वाढदिवसानिमित्त एक वेगळा आणि समाजोपयोगी निर्णय जाहीर केला आहे.
वाढदिवसाच्या निमित्ताने कोणताही सत्कार, पुष्पहार, बुके किंवा भेटवस्तू स्वीकारणार नसल्याचे त्यांनी स्पष्ट केले आहे. त्याऐवजी कार्यकर्ते, समर्थक आणि नागरिकांनी या खर्चातून गरजू विद्यार्थ्यांना पुस्तके, वह्या, दप्तरे आणि इतर शालेय साहित्य भेट द्यावे, असे आवाहन त्यांनी केले आहे.
विद्यार्थ्यांच्या शिक्षणाला हातभार लावणे हीच खरी वाढदिवसाची भेट ठरेल, असे त्यांनी म्हटले आहे. या उपक्रमासाठी लोणी येथील प्रवरा कन्या मंदिरमधील गंगुबाई विखे पाटील इनडोअर स्टेडियम येथे विशेष केंद्र सुरू करण्यात आले आहे. १० जून ते १५ जून दरम्यान नागरिकांना शालेय साहित्य जमा करता येणार आहे.
नक्कीच, सामाजिक बांधिलकी जपत विद्यार्थ्यांचे भविष्य उज्ज्वल करण्याचा हा संकल्प अनेकांसाठी प्रेरणादायी ठरणार आहे. वाढदिवस साजरा करण्यापेक्षा एखाद्या विद्यार्थ्याचे भविष्य घडवणे अधिक महत्त्वाचे आहे, हा संदेश या उपक्रमातून दिला जात आहे.
