शेतकऱ्यांसाठी मोठी बातमी समोर आली आहे. अहिल्यानगरच्या नेप्ती उपबाजार आवारात शनिवारी कांद्याची मोठी आवक झाली. तब्बल ५२ हजार ८७३ गोण्यांची आवक नोंदवण्यात आली. लिलावात एक नंबरच्या कांद्याला प्रतिक्विंटल ४ हजार १०० ते ४ हजार ५०० रुपयांपर्यंत भाव मिळाला.
मंडळी, कांद्याचे दर काही दिवसांपूर्वी ५ हजार रुपयांपर्यंत पोहोचले होते. मात्र मागील आठ दिवसांपासून दर ४ हजार ५०० रुपयांच्या आसपास स्थिर असल्याचे चित्र आहे.
याच दिवशी नेप्ती बाजारात २९ हजार ८० क्विंटल कांदा विक्रीसाठी आला. दोन नंबरच्या कांद्याला २ हजार ८०० ते ४ हजार १०० रुपये, तीन नंबरला १ हजार ४०० ते २ हजार ८०० रुपये, तर चार नंबरच्या कांद्याला ७०० ते १ हजार ४०० रुपये भाव मिळाला.
विशेष म्हणजे उच्च प्रतीच्या कांद्याला आणखी चांगला भाव मिळाला. १२ गोण्यांच्या लॉटला ४ हजार ८०० रुपये, ५२ गोण्यांना ४ हजार ७०० रुपये आणि ४२ गोण्यांना ४ हजार ६०० रुपये प्रतिक्विंटल भाव मिळाला.
बाजार समिती प्रशासनाने शेतकऱ्यांनी कांदा प्रतवारी करून आणावा आणि २४ तासांत हिशोबपट्टी घ्यावी, असे आवाहन केले आहे.
