तुमच्या हक्काचं रेशन दुसऱ्याच व्यक्तीने उचललं, तर तुम्हाला त्याची माहिती मिळू शकते. यासाठी तुमच्या शिधापत्रिकेला आधार कार्ड आणि मोबाईल क्रमांक जोडलेला असणं महत्त्वाचं आहे.
सार्वजनिक वितरण प्रणालीअंतर्गत लाभार्थ्यांना स्वस्त किंवा मोफत धान्याचं वितरण केलं जातं. रेशन दुकानात ई-पॉस मशीनद्वारे अंगठ्याचा ठसा घेऊन धान्य दिलं जातं. काही तांत्रिक अडचणींमध्ये ओटीपीचाही वापर होऊ शकतो.
धान्याची उचल झाल्यानंतर मोबाईलवर एसएमएस मिळाल्यास व्यवहाराची माहिती समजू शकते. त्यामुळे तुमच्या रेशनचा गैरवापर झाला आहे का, हे लक्षात घेण्यास मदत होते.
मोबाईल नंबर अपडेट करायचा असेल, तर सर्वप्रथम तुमच्या गावातील रेशन दुकानदाराशी संपर्क साधा. तिथे प्रक्रिया पूर्ण न झाल्यास तहसील कार्यालयातील पुरवठा विभागाशी संपर्क साधून अर्ज करा.
महत्त्वाचं म्हणजे, दिलेल्या माहितीनुसार मोबाईल नंबर अपडेट करण्यासाठी शुल्क आकारलं जात नाही. त्यामुळे आजच तुमच्या शिधापत्रिकेशी मोबाईल नंबर जोडलेला आहे का, हे तपासा आणि आपल्या हक्काच्या रेशनच्या व्यवहारांवर लक्ष ठेवा!
