अहिल्यानगर जिल्ह्यातील अकोले तालुक्यातून एक अत्यंत थरारक आणि मन सुन्न करणारी घटना समोर आली आहे. ज्या मित्रांवर जीव ओवाळून टाकला, त्याच मित्रांनी विश्वासघात करत आपल्याच साथीदाराची गोळ्या झाडून निर्घृण हत्या केली. पेढेवाडी शिवारात घडलेल्या या धक्कादायक प्रकारामुळे संपूर्ण परिसरात खळबळबळ उडाली आहे. भोरु सोमा कातोरे असे या दुर्दैवी मृत तरुणाचे नाव आहे. मैत्रीच्या नात्याला काळीमा फासणारी ही घटना १२ ऑक्टोबर २०२६ रोजी दुपारच्या सुमारास घडली असून, पोलिसांनी तात्काळ पावले उचलत दोन्ही संशयित आरोपींना बेड्या ठोकल्या आहेत. न्यायालयासमोर हजर केले असता आरोपींना पोलीस कोठडी सुनावण्यात आली आहे.
नात्यातील जवळीक ठरली मृत्यूचे कारण
मयत भोरु कातोरे, धोंडु सोमा पथवे आणि नवनाथ नारायण कुलाळ हे तिघेही एकमेकांचे घट्ट मित्र होते. मात्र या मैत्रीत मिठाचा खडा तेव्हा पडला, जेव्हा भोरुचे आरोपींच्या जवळच्या नात्यातील एका मुलीसोबत प्रेमसंबंध असल्याचे समोर आले. भोरु वारंवार त्या कुटुंबाच्या संपर्कात राहण्याचा प्रयत्न करत होता, तसेच घरात येऊन बसणे आणि जवळीक साधणे अशा गोष्टी त्याच्याकडून घडत होत्या. आपल्याला कोणी पाहत नाही अशा भ्रमात भोरु होता, पण त्याच्या प्रत्येक हालचालीवर त्याचेच मित्र बारीक लक्ष ठेवून होते.
समजूत काढूनही वागण्यात बदल नाही
या अनैतिक संबंधांची कुणकुण लागल्यानंतर धोंडु आणि नवनाथ यांनी भोरुला एकत्र बोलावून समज देण्याचा प्रयत्न केला होता. मात्र भोरुने आपले कोणाशीही प्रेमसंबंध नसल्याचा दावा करत मित्रांचे म्हणणे फेटाळून लावले. मित्र म्हणून दिलेल्या सल्ल्याकडे त्याने साफ दुर्लक्ष केले. दरम्यानच्या काळात गावामध्ये या प्रकरणाची जोरदार चर्चा सुरू झाली, ज्यामुळे आरोपींच्या संतापाचा पारा चढला. आपल्या कुटुंबाची बदनामी सहन न झाल्याने त्यांनी अखेर भोरुचा काटा काढण्याचा अंतिम कट रचला.
दारूची पार्टी आणि जंगलात थरार
कटानुसार दोन्ही आरोपींनी भोरुला काहीही संशय येऊ न देता एका ठिकाणी दुचाकीवर बोलावून घेतले. सुरुवातीला तिघांनी मिळून मद्यप्राशन केले. त्यानंतर आरोपींनी भोरुला पेढेवाडी शिवारातील एका घनदाट जंगलात नेले. तिथे त्याला त्याच्या चुकीची जाणीव करून देत जोरदार मारहाण करण्यात आली. वाद विकोपाला गेल्यानंतर आरोपींनी जवळ असलेल्या गावठी बंदुकीतून भोरुच्या बरगडीखाली थेट गोळ्या झाडल्या. गोळी लागल्याने भोरुचा जागीच मृत्यू झाला. गुन्ह्याचा पुरावा नष्ट करण्यासाठी त्यांनी मृतदेह पालापाचोळ्याने झाकून टाकला आणि तिथून पळ काढला.
अकोले पोलिसांकडून गुन्ह्याचा उलगडा
भोरु दोन दिवस घरी न परतल्याने त्याचा भाऊ मनाजी कातोरे याने अकोले पोलीस ठाण्यात तो बेपत्ता असल्याची तक्रार नोंदवली. पोलिसांनी तपासाची चक्रे फिरवली असता, त्यांना सुरुवातीला भोरुची बेवारस दुचाकी सापडली. अधिक चौकशीत गायब झालेल्या दिवशी भोरु हा धोंडु आणि नवनाथ सोबत दिसल्याची माहिती पोलिसांना मिळाली. संशय बळावल्याने पोलिसांनी या दोघांचा शोध घेतला असता ते घरातून पसार झाले होते. अखेर पोलिसांनी तांत्रिक विश्लेषणाच्या आधारे धोंडु पथवे आणि नवनाथ कुलाळ या दोघांना ताब्यात घेतले. शवविच्छेदन अहवालात गोळ्या झाडून हत्या झाल्याचे स्पष्ट होताच पोलिसांनी हत्येचा गुन्हा दाखल केला. पोलीस निरीक्षक संदीप कोळी या प्रकरणाचा पुढील तपास करत आहेत.
