स्वतःला अवतार मानणाऱ्या Ashok Kharat याचे काळे साम्राज्य उद्ध्वस्त होण्यामागे त्याच्या जवळच्या लोकांनी दाखवलेले धाडस निर्णायक ठरल्याचे समोर आले आहे. सिन्नरमधील मिरगाव येथील फार्महाऊसवर काम करणाऱ्या कूकला संशय आल्यानंतर त्याने पाहिलेल्या घटनांची माहिती पुढे ड्रायव्हरपर्यंत पोहोचली आणि तिथूनच या प्रकरणाला सुरुवात झाली.
त्यानंतर एका ऑफिस बॉयने मोठा धोका पत्करत कार्यालयात गुपचूप स्पाय कॅमेरा बसवला आणि त्यात कैद झालेले व्हिडिओ पाहून अनेकजण हादरले. या फुटेजमध्ये महिलांबरोबरचे अशोभनीय वर्तन आणि भक्तांची फसवणूक स्पष्टपणे दिसून आली.
उमाकांत तायडे, राजेंद्र जासूद, दिनेश परब आणि ललित पोफळे यांनी धाडसाने हे पुरावे पुढे आणत शिर्डी पोलिसांपर्यंत पोहोचवले, ज्यामध्ये सुमारे 160 जीबी डेटा सादर करण्यात आला.
या प्रकरणामुळे एकेकाळी त्याला देव मानणाऱ्या समर्थकांनीच त्याच्याविरोधात उभे राहत त्याचे खरे रूप उघड केले. सध्या पोलिसांकडून या व्हिडिओंची तांत्रिक तपासणी सुरू असून आणखी मोठी नावे समोर येण्याची शक्यता व्यक्त केली जात आहे.
दरम्यान, नाशिक सत्र न्यायालयाने सहाव्या गुन्ह्यात त्याला 14 दिवसांची न्यायालयीन कोठडी सुनावली असून विशेष तपास पथकाने सातव्या गुन्ह्यासाठी पुन्हा ताब्यात घेण्याची प्रक्रिया सुरू केली आहे.
