शाळेत जाणाऱ्या १४ वर्षीय मुलीचा सतत पाठलाग, सोशल मीडियावर मेसेज आणि धक्कादायक धमकी… अहिल्यानगरातील ही घटना प्रत्येक पालकाने जाणून घ्यायलाच हवी.
मंडळी, अहिल्यानगर शहरात १४ वर्षीय विद्यार्थिनीला त्रास दिल्याचा गंभीर प्रकार समोर आला आहे. पोलिसांकडे दाखल झालेल्या फिर्यादीनुसार, संबंधित युवकाने मे ते जुलै २०२६ या कालावधीत शाळेत ये-जा करताना मुलीचा पाठलाग केला.
तिला भेटण्याचा आग्रह धरत जवळीक साधण्याचा प्रयत्न केला आणि नकार मिळाल्यानंतर सोशल मीडियाचा आधार घेतल्याचा आरोप आहे. मुलगी अल्पवयीन असल्याची माहिती असूनही तिच्या आईच्या मोबाईलवर वारंवार संदेश पाठवण्यात आल्याचे फिर्यादीत नमूद आहे.
इतकेच नव्हे, “तुझ्यासाठी मी जेलमध्ये जाईन, पण मला तू पाहिजेस. तुम्हाला जे करायचे ते करा,” अशा आशयाचे संदेश आणि धमकी दिल्याचा आरोप करण्यात आला आहे.
या प्रकरणी कोतवाली पोलीस ठाण्यात संबंधित युवकाविरोधात POCSO कायद्यासह विविध कलमांनुसार गुन्हा दाखल करण्यात आला असून पुढील तपास सुरू आहे.
