मंडळी, नेहमीप्रमाणे यंदाही बुद्ध पौर्णिमेच्या रात्री कळसूबाई हरिश्चंद्रगड अभयारण्यात वन्यप्राण्यांची गणना करण्यात आली. भंडारदरा आणि राजूर या दोन वनपरिक्षेत्रात ही मोजणी झाली आणि त्यात एकूण तब्बल ३१७ वन्यप्राणी आढळून आले.
या गणनेसाठी विशेष पद्धतीचा वापर करण्यात आला. पाणथळ जागांवर मचान उभारण्यात आले, मनोऱ्यांवरून निरीक्षण करण्यात आले, तर काही ठिकाणी कॅमेऱ्यांचाही वापर करण्यात आला. एकूण ३२ ठिकाणी वन्यप्राण्यांच्या हालचालींवर लक्ष ठेवून ही मोजणी करण्यात आली. यामध्ये भंडारदरा वनपरिक्षेत्रात ६४ तर राजूर वनपरिक्षेत्रात सर्वाधिक २५३ वन्यप्राणी आढळले.
आता नेमके कोणते प्राणी दिसले, हेही जाणून घेऊयात.. या गणनेत १० बिबटे, १४ तरस, ३२ सांबर, २५ रानडुक्कर, १७ कोल्हे, १६ भेकर, १४ उदमांजर, तसेच वानर आणि माकडांचा मोठा वावर नोंदवण्यात आला आहे. याशिवाय काही रानकोंबडे आणि इतर प्राण्यांचीही नोंद झाली आहे.
मंडळी, या गणनेमुळे जंगलातील जैवविविधतेचा अंदाज येतो आणि वन्यजीव संवर्धनासाठी महत्त्वाची माहिती मिळते. विशेष म्हणजे बिबट्यांसारख्या प्राण्यांची उपस्थिती ही जंगलाच्या आरोग्यासाठी चांगली मानली जाते. पौर्णिमेच्या शांत चांदण्यात झालेली ही गणना केवळ आकडेवारी नाही तर आपल्या निसर्गाची समृद्धी दाखवणारी एक झलक आहे.
