आतापर्यंत रेल्वेचं ऑनलाइन तिकीट बुक करताना प्रवास विम्याचा पर्याय निवडता येत होता. मात्र, रेल्वेच्या आरक्षित काउंटरवरून तिकीट घेणाऱ्या प्रवाशांना ही सुविधा मिळत नव्हती.
आता भारतीय रेल्वेनं या नियमात मोठा बदल करण्याचा निर्णय घेतला आहे. सर्वोच्च न्यायालयाच्या निर्देशानंतर २७ ऑक्टोबर २०२६ पासून काउंटरवरून आरक्षित तिकीट घेणाऱ्या प्रवाशांनाही प्रवास विम्याची सुविधा देण्यात येणार आहे.
सध्याच्या ऑनलाइन विमा योजनेनुसार, अवघ्या ४५ पैशांच्या प्रीमियममध्ये पॉलिसीच्या अटींनुसार मृत्यू किंवा कायमस्वरूपी पूर्ण अपंगत्व आल्यास १० लाख रुपयांपर्यंत विमा संरक्षण मिळू शकतं.
मात्र, काउंटरवरील तिकिटांसाठी विम्याचा प्रीमियम, आवश्यक कागदपत्रं आणि क्लेमची प्रक्रिया याबाबतची अंतिम माहिती अद्याप स्पष्ट झालेली नाही. त्यामुळे तिकीट बुक करताना रेल्वेच्या अधिकृत सूचनांकडे लक्ष द्या.
